Guide

Fàtzili no est stètiu mai su de biri e atobiai a is janas ma nanta chi oindì puru sìgant a bivi aintru de is grutas o de is domus de janas.

Chini a su mancu una borta bias das at, contat chi is janas tènint sa peddi bianca che su nie.

Po cust’arrexoni a su noti ndi làssant is domus insoru e ndi bèssint a foras, ca a su mancu sa luxi de su soli no das podit strobai e nemancu fai mali.

Candu in su celu sa luna no s’acàrat, intzandus issas anke is nuraxisbàndant a pregai e arresai , ma in su passai in mesu a is morixeddus, meda diarerus tìminti sa mur”e ‘rrù e is ispinas. E candu cuidadosas mòvint in mesu a su padenti e a is tupas, nisciunu scit su poita ma ndi bèssint alluxinadas che lantixeddas, lassendi diaici in s’àiri unu pagu de luxi chi totus pòdinti biri.

Ancoras, de issas nanta chi bravas e capàssias siant meda a fai su strexu e is atras fainas de domu, ma s’arti insoru chi totus nanta siat cosa de spantu est sa de tessi e filai. E candu trabàllant si pònint a cantai poesias in sardu po fai cumpangia unu pagu a pastoris, messajus e bagamundus.

Atrus nanta chi is janas, su prus bellu scusòrgiu de su mundu stùgint in calincunu logu de Sardìnnia, chi, sìghint a nai, nisciunu podit furai ca a du castiai, a is muscas maceddas nci anti postu, mostrus a conca de brebei chi un’ogu sceti e is dentis atrivius tèninti.