Questo sito contribuisce alla audience di

Noas...EJA: est essidu su nùmeru 2

In custu nùmeru sighit sa rubrica dedicada a sas normas de sa Limba Sarda Comuna.

Noas...EJA Est giai in distributzione gratùita in sas librerias de Nùgoro: ‘900, San Paolo, Mondadori, Biblioteca Satta (setz. sarda).

Dae sa chida ch’intrat at a èssere finas in Tàtari: Koinè, Messaggerie Sarde, Odradek; in Casteddu: Cuec, Fahreneit, Tiziano, Murru.

Chie cheret agiuare a la distribuire in àteras tzitades, nos iscriat: noas.eja@gmail.com

Inoghe podides agatare sa versione pdf de su nùm. 2

In custu nùmeru sighit sa rubrica dedicada a sas normas de sa LSC, chi como tenet finas unu blog ue podides agatare cussìgios, curretziones, solutziones a problemas de lèssicu, interferèntzias, ortografia.

Pro propònnere pregontas e retzire rispostas de limba, podides finas iscrìere a: limbasardacomuna@gmail.com

Sende chi su sardu est sa de duas limbas de s’istadu italianu, pro cantidade de pessones chi la faeddant, sa presèntzia sua in sos mèdios de informatzione est belle nudda, francu carchi tentativu imprentadu in pabiru. E no est sa prima bia chi finas su grupu de amigos chi est publichende custa sèrie noa de Noas est proende a dare iscritura e informatzione in sardu.

Ma, a dolu mannu, non resessimus a dare continuidade a custos propòsitos e, tando, a pustis de unu, chimbe o deghe nùmeros, su tentativu s’indebìlitat e morit, o ca mancant sos mèdios econòmicos o ca si nch’istracant sas pessones chi bi traballant.

Però ischimus cantu est importante, pro s’ufitzialidade de sa vitalidade de sa limba, a tènnere a disponimentu mèdios de informatzione modernos. Finas pro isperimentare su sardu in su mundu de oe.

E tando proamus torra a bogare a lughe custu fògiu totu in sardu, pro tratare argumentos de limba sarda/limbas, minorias, natzione sarda/natziones, cun s’idea de cuntentare chie tenet gana de lèghere e imparare in sardu e cun s’isperu de sighire a lu publicare, cun s’agiudu de amigos o entes chi nos agiuent.

Bogadu de Noas…EJA

Po ndi sciri de prus:
Noas…EJA
Limba Sarda Comuna, limba pro totu, limba de totus