Questo sito contribuisce alla audience di

Ta bellu su domminigu e atrus cantus

Su de tres ciddì de sa cannaca Donne.

rossella faa
De unas cantu cidas su giornali L’Unione Sarda nd’at bogau a pillu “Donne”.

Est una cannaca de ciddì musicalis intregada a is fèminas cantadoras.

A pustis de Maria Carta i Elena Ledda, custa est sa cida de Rossella Faa.

Su ciddì cosa sua pòrtat su tìtulu Ta bellu su domminigu e atrus cantus e ndi arregollit treixi cantzonis, giai pubricadas in is discus In Corde e Baa-bà: Ta bellu su domminigu, Soba, Nexi po nexi, Mi cheria masedu, Cannacca macca, Ciccaia cumpangia, Oro oro, Sorri mia, Narami cument’è, Aiaia mia Santu ‘Idesa, S’acqua e s’oru, Sa vela e Masuddas.

Totu s’universu musicali de sa cantadora casteddaja, spartziu tra connotu e sonus istràngius. Unu mundu spèrdiu intr”e is contus sardus prus sintzillus e sa manera de dus cantai ki ndi parit bessia de s’Amèriga Latina. Istòrias e paristòrias ki pàrinti scritas de Gabriel Garcia Marquez ma acadèssias in Sardigna.

De sa picioca friketona pintada in Cannacca macca a is contus intèndius de sa ajaja de Santu Idu, a sa coja intr”e sa bagadia e s’òmini a ogus bellus cun una folla de afàbica a palas de s’origa.

Contus cantaus de is vidas de sa genti po arrexonai a pitzus de su sentidu de sa vida, po ndi sciri de prus a pitzus de is sentimentus de òminis e fèminas. Prexu e amargura, amigàntzia e disamistadi, giogus e cosas de importu.

Un’arregorta consillada a kini pòrtat aintru ancoras sentidus e sentimentus ca sa boxi sua movit is cordas prus antigas de s’ànima. Ma puru a kini su connotu musicali sardu no du iat intèndiu mai.

Una manera noa de cantai sa sardidadi, una boxi de spantu ki cantat contus e istòrias de sa vida sentz”e tempus.